Contoh Cerita Rakyat Nias "Baewa Sifaero"

Fabali nulura nidanö Noyo, nidanö Zusua yawa bahili sotöi Lali goholu. Me föna bahili andrö yawa, so goholu sesolo solali. Niwa’ö zangalangalahi, so mato sa dumba tanömö dadaoma mbayania. Ta’ila tagölöigö tödöda wa’esolo goholu andre. Oholu andre, ba töi geu da’ö si fakhili ba döla zuku. Sinanö so daha, sawe’ewe’e uli, tola mubali’ö baru meföna guli goholu, na no muhaogö ia.

Samuza ma’ökhö, barö lali goholu andre, tumbu nono mbaewa si faero. Nofagölö-gölö wa’esolo, no baga-baga, a’usö la’a-la’a me baewa ana’a. Me ise’ise na ira ba awai halöwöra ha fe mörö-mörö manö. Na olofo ira ba ladou öra nono guro sahatö ba da’ö.

Meno faoma egesolo ira, ba lalau fahuohuo khö nawöra darua ira.

Imane si sara, ”Na so manö ita bada’a ba ambo nahada dögi andre. Tenga simanö datafawu’a ita. Tarongo-rongo so nidanöse bolo sibai sotöi asi.”

Imane si sara, "Lau ! Hawa’ara mofanö ita ? Data endongagö wofanö, lö na atö ata’u ia bal ala."

Imane si sara, "He wisa naba zidua wongi mofanö ita wanawa asi ?”

Itema si sara imane, "Te ya’ia da’ö,da’ua tafaanö ita, datahalö khöda wa’abölö ba wo fanö ba lala. Ba abölö sökhi na arakhagö moluo mofanö ita, lö na’atö fakhamö aukhu khöda zino ba lala.

Irugi khöda mbongi sino la’osara’ö, irugi khöda mbongi si no lahono göi. Maoso khöda si sara, imane tödönia, "I da’uhulö ia wofanö, alio na atö urugi moroi khönia, da’uröi ia furi, akha erege dödönia wolohi ya’o. "Andrö dania,ha talu mbongi, ilau mofanö, no nasa mörö-mörö zi sara.

Me'arakhagö moluo tokea khöda zi sara. Ifaigi-ifakhölö ia, mu hede ia imane, "Heza so ndraugö le ! Mofanö ita. "Lö gini-gini. No sa mo fanö ia. Hatö ondöniwa nia, ni’ila nia. Mofönu sibai mbaewa niröi no mege.

Imane, "Ba meno ölimodo, ba meno ösawö zi no ta’osara’ö ba meno ösawö zino tahonogöi, ba ya’ösöndra wa’a fökhö balala. Ya’anau lala ni töröu, ya’a hiwö-hiwö lala nitöröu, ya’öfasui-suigahe hili ba ya’ötörö lala arö danö. Ba meno ölimo ndra’o bawa’atulö dödögu, ba ya’aoha khögu wanörö lala nitörögu ya’aruru hili fönagu ba ya’a dölö lala nitörögu.”

Mofanö mege mbaewa niröi no mege, lö göi sa’ae igo’ö lala nitörö zi oföna no mege. Itörö lala bö’ö, ifabali lalania. He wisa mbaewa sa furia mofanö no mege ? Aoha sibai khönia wa nörö lalania. Agaruru hili fönania, fataba manö lalania, adölö manö lalania. Adogo-dogo lala nitörönia. Lö ara, lö moluo sibai no irugi tou nasi. Töi nia mbaewa sesolo sibai, tobali ungo nidanö gondröniwania moroi furinia. Ondröniwania, si tobali ungo nidanö andrö dania, ya’ia siraya ni danö Zusua andrö.

He wisa göi mege mbaewa si’oföna mofanö no mege ? Erege dödönia wanörö lalania. Anau sibai lala nitönörö nia, irege itörö lala arö danö ua awena alua ia ba nasi. Hewisa göi gondröniwaö niambalazi wa’esolo nia. Ondröniwania tobali ungo nidanö, ya’ia sito nidanö Noyo andrö si tehö ngö teturia fa’ebua ba fa’enau ba danö niha.

Andrö ba wa’auri andre, böi talimo nawöda ba wanguhulö awöda. Böi ta sawö zi no tahonogöi, böi ta sawö sino ta’osara’ö. Akha tatörö ba akha tafalua fefu zino ta’osara’ö, fefu zi no tahonogöi.

Diketik ulang oleh : Ordeli Yamotuho Zalukhu

Kelas : XI-IPA 2

SMA N. Unggulan Sukma Nias
T.A. 2012/2013